Pagpili og punoan

MAtod pa, “rain or shine” madayon gyod ang eleksiyon sa barangay. Ang atong katungdanan nga mga botante ang pagpili kinsa ang himuon nga pangulo o kapitan sa atong barangay. Sugdan na nato karon paghunahuna kinsa ang maayo sa atong barangay.

Dili kita mopili kay compare apan walay kalaki. Pilion usab kay higala walay nada. Pilion kadtong dunay igong katakos nga modumala sa barangay. Dili kadtong magpalumaluma apan dili antigo-matod pa sa sultihon sa Bol-anon.

Naa man goy magpapili tungod sa garbo apan walay sulod ang ulo. Nagsalig kay puno ang bulsa. Unya kon mopili, kitang katawhan maapil sa kaulaw. Kay moingon man ang silingan nga barangay: “Siyaro wala na gyoy mapili nga arang-arang nianang ilang kapitan?”

“An army of stags led by a lion is better than an army of lions led by a stag,” matod pa. Busa kon daghan ang liyon sa atong barangay, dili gyod maayong pillion ang usa. Unsay kahimuan sa usa (stag) diha sa panon sa mga liyon?

Duna man guy kulang ang sulod ang ulo apan puno ang bolsa, mokandidato kay gigamhan sa garbo. Ang resulta kon modaog man, ang barangay mahisama sa sakayan nga usahay tino nga distinasyon kay madisilya-demano tungod ka yang kapitan walay kaugalingon nga desisyon. Pulos man lang dawat sa mga tambag kay wala may hanaw.

Sa mga kagawad usab. Ayohon nato pagpili kanang adunay kalidad, dili ang kantidad. Nasinati ako sa ubang barangay sa miaging eleksiyon sa barangay. May midaog pagkakagawad kay namalit og boto.

Ang mga botante usab nasayod man unta sa kalidad sa maong kandidato. Apan kay gipalit lang og tag P10.00 ang ilang boto ug midaog. Ug komusta man diha sa konseho? Nagtak-om lang kanunay ang baba mora sa kinhason nga toway. Hionaot nga dili na kini mahitabo karong moabot nga eleksiyon. Hinaot ug hinaot gyod unta. Salamat.(Serg Santafe)