Kamingaw

KAMINGAW! Pulong nga lisod nimo tugkaron ilabina kon ikaw ang mibati niini. Ang kamingaw mahitabo kon ang usa ka tawo nga imong gimahal tua na sa layo og dugay mo na siya nga wala makita. Gani dunay uban nga tungod sa kamingaw moingon nga daw sa mabuang na sila.

Ang kamingaw hinuon matambalan sumala pa sa uban. Tinuod kana ilabina kon makita na nimo ang tawo nga imong gikamingawan.

Nasulat ko kini kay aduna akoy tawo nga gikamingawan. Gani sa dihang mingawon na ako daw sa hilapon ang akong kasingkasing, daw sa adunay mga gagmitoy nga mga kulamoy nga mikusi sa akong duha nga dili na lang gani nako mamatikdan nga naglumba na sa pagpangambak ang luha sa akong mga mata.

Ang pagtambal sa kamingaw daghang paagi. Mahimo nga imong tawagan sa telepono o sa text ba kaha siya o padal-an og sulat. Ang uban magtipig og larawan sa ilang minahal o dili ba kaha ang sinina nga wala malabhi nga nagpabilin ang baho sa maong tawo maoy ilang simhoton kon mokablit na ang kulamoy sa kamingaw.

Ang kamingaw nga akong gibati dili matambalan nianang tanan nga mga pamaagi. Ilabina nga ang akong gikamingawan atua na sa lilo sa kamatayon. Magsud-ong man ako sa ilang mga larawan apan mosamot lamang sa paglumba og pangatagak ang luha sa akong mga mata. Ang akong amahan ug inahan wala na. Tua na sila sa mabugnaw nga lubnganan. Silang duha sa diyang gikasal nag-ingon nga "Till death do us part," apan bisan ang kamatayon wwala makabulag kanila kay nagkuyog man gyud sila hangtud sa kamatayon.

Dili ko malimot nga sa dihang gipatay sila didto sa Jolo sa mga wala mailhing tawo makita nako ang ilang gugma sa usag-usa. Tungod kay ang akong amahan naggakos gihapon sa akong inahan diin silang duha pulos wala nay mga kinabuhi.

Sa ilang pagpanaw gibinlan nila ako og usa ka dakong responsabilidad nga daw yugo nga gisangon sa akong liog. Isip kinamagulangan nga anak ako ang ikaduhang inahan ug amahan sa akong walo ka mga igsoon.

Dunay mga panahon nga makapangutana ako nganong nahitabo pa kini. Gani usahay bation ko nga daw dili na nako makaya ang tanan. Usahay makamata na lang ko nga nabasa na ang akong unlan sa mga luha nga bisan sa akong katulogon nabalon ko ang kamingaw ug kaguol sa ilang pagpanaw.

Kon nasayod pa lamang unta ako nga sayo sila nga mawala kanako ako na lang unta nga gihurot ang akong higayon nga makanunay ko sila sa pagkauban. Apan kinsay nasayod? Ulahi na ang tanan. Mao ang ang kamingaw dili man gyud malikayan hinungdan nga ang akong hunahunaon kadto na lamang higayon nga malipayon kami nga nag-uban sa akong mga ginikanan.

Unta nasulti ko nila ang mga pulong nga gimahal ko sila. Alang niadtong ang inyong minahal anaa pa sa inyong kiliran buhata ang angay buhaton ug isulti ang angay isulti ngadto kanila.

Katapulan, kagutom ug ang pato

MOTAN-AW kita sa atong palibot karon daghan sa atong mga igsoon ang gigutom. Daghan ang gitawag nga grassroots of the community. Ang kapobrehon man gud sagad atong ibasol dayon ngadto sa mga namunuan kay lagi gikorakot ang kuwarta alang sa ilang mga personal nga interes.

Daghan nga atong makita nga mokalit lang og panguhit kanato sa daplin sa dalan, sa simbahan ug bisan asa kay mangayo o magkilimos. Kon tan-awon nato kini nga punto mora og mabasol nato ang gobiyerno apan kon atong tugkaron pag-ayo ang mabasol nato niini mao ang katapulan sa usa ka tawo.

Duna bitaw giingon kaniadto ni John F. Kennedy nga dili nato paabuton unsa ang mahimo sa gobiyerno alang kanato kon dili unsay atong mahimo alang sa gobiyerno. Ipasabot nga dili nato nga kanunay nga iyangongo sa gobiyerno ang atong mga gikinahanglan. Mao nga daghan ang gigutom tungod sa katapulan sa tawo. Alang sa mga tapulan mosulay kita og paniid sa hulmigas nga bisan wala silay kapatas o mga amo apan naningkamot sila alang sa pagpangita ug pagkaon sa ting-init aron duna silay makaon panahon sa ting-ulan. Sama unta usab niana ang buhaton sa mga tapulan dili kay magsige lamang og katulog.

Tuod basin mangutana kamo ngano man nga dunay pato nga nabutang sa ulohan niining akong obra karon. Kini man gud maykalambigitan sa giingon sa uban nga iampo na lang nato sa Ginuo ang tanan aron kita tabangan. Dili sad kana mahimo kay sumala pa lihok tawo kay tabangan ko ikaw.

Ay balik ta sa pato. Si Juan lagi kay hilabihan katapulan uban sa iyang dose ka tapulan sad nga mga anak gadagko lang ang lawas wala nay makaon. Mao nga ang gihimo ni Juan iyang gitawag ang iyang mga anak nga mag-ampo na lamang sila sa Ginuo aron tabangan sila.

"Mga anak maggunitay kita sa atong mga kamot ug mangayo kita og pagkaon sa Ginuo," awhag ni Juan sa iyang mga anak.

Mao kadto nga miampo dayon si Juan uban ang iyang mga anak nga nagpiyong dungan sa pagsinggit ngadto sa Ginuo. "Ginuo! gutom na kaayo mi tagai mi og pagkaon!"

Sa dihang nakadungog ang Ginuo iyang gisugo ang usa sa iyang mga anghel kadtong pinakalabong gyud og pako aron dali nga makaabot sa nahimutangan ni Juan.

"Anghel adtua si Juan nga gigutom na kaayo ingna nga gisugo teka," sugo sa Ginuo.

Wala maglangan ang anghel miadto siya sa nahimutangan ni Juan. Iyang naabtan si Juan uban sa dose ka mga anak niini nga nagpiyong nga nagpunay gihapon og panawag og panabang sa Ginuo mao nga iyang gikuhit ang ilong ni Juan.

"Juan gisugo ko sa Ginuo."

Dali nga gibuka ni Juan ang iyang mata ug nakurat sa iyang nakita ang anghel sa iyang atubangan.

"Mga anak bukha ang inyong mga mata, tabangi ko ninyo diay dako kaayong pato pagkaon nani ato ning tabangan og himolbol," singgit ni Juan dayon layog sa anghel.

Gumikan sa kagutom man gud pato na ang panglantaw ni Juan sa anghel.

Kamo na lay tapos unsay nahitabo sa anghel ha.

Niwang vs Tambok

DAGHAN ang nag-ingon nga basta niwang ka dunay parte sa imong lawas nga dako. Ug kon tambok sad ka dunay parte sa imong lawas nga mogamay.

Ang akong gitumong mao ang mahitungod ni 'Manoy'. Mogamay daw si Manoy kon motambok kana dayon kon niwang mas dako si Manoy.

Sa akong pagbisita sa blog ni Batang Buotan nga iyang gihisgutan ang mahitungod sa sex sense niya daghan ang mipadayag sa ilang mga reaksiyon. Gani duna pay miingon nga maayo gyud diay ang niwang kay dagko. Oppss dili tanan tingali sa mga niwang ang dagko sad duna pud tingali nga gagmay sama pud sa tambok.

Misulay ko og pangutana niini sa akong kauban sa trabaho ug ang iyang tubag nga tinuod nga sa niwang lahi ra itandi sa tambok apan dili man ang gidak-on ang imporatante kon dili giunsa nimo kini paghimo.

Dunay kaso sa Misamis Occidental nga ang asawa nakigbulag sa iyang bana dili tungod kay gigamyan siya apan tungod kay gidak-an ra siya. Miabot gtyud kini sa korte. Gani sa ilang hearing iyang gireklamo nga ang kadako sa Manoy sa iyang bana ang nahimo na niya nga problema tungod kay dili na siya satisfied niini kon dili masakitan na siya niini. Gani nga nahimo pang komedya nga ang kaso unta nga gipasaka sa asawa mao ang illegal possesion of deadly weapon.

Alang niadtong mamili og dako beware. Makadot ang bisan unsang butang nga kulang. Ang sobra sad hinuon ka gamay sumala pa dili makatagbaw.

Misulay ko og bisita sa website ni Dr. Margie Holmes diin nakakuha ko og mga maayong tubag. Sumala pa nga ang gidak-on o ang gigamyon dili mao ang hinungdan sa tinuod nga kalipay ug katagbawan. Sumala pa niya. Size does not matter its how you do it.

Mag-unsa man ang dako og dili pud kabalo. Heheheh...

Pero alang niadtong niwang nga gusto nga manambok aduna koy tip nga ihatag ninyo kay kaniadto niwang baya pud ko.

Gani sunlogon ko kaniadto nga wati na lang ang wala kapirma o mora ko'g bitok nga giinat. Ang sekreto aron nga motambok o makabaton ka og saktong lawas nga dili niwang o tambok anaa ra gyud sa imong pagdisiplina sa kaugalingon.

Sakto nga tulog ug saktong kaon ug ehersisyo.

Alang kanako lahi ang akong gibuhat aron nga nasulbad nako ang akong kaniwang kaniadto. 'Baho'g itlog ko kada buntag'. Mao na ang tinuod baho'g itlog kada buntag, kadapamahaw.

Kanang imong itlog este itlog sa manok imo na nga imalasado og ibahog kada-pamahaw kon dili nimo kaya puwede sad kanang boiled egg. Kay sugad nga ako kanang gibuhat migana ang akong kaon bisan wala koy sud-an sa paniudto ug sa panihapon. Testingi lang...Basta 'BAHO'G ITLOG!

Mabugnaw nga kalayo?

Tinuod kaha kini o tungod nasad ni sa photoshop?

Tinuod kaha nga ang usa ka macho nga boxer miyembro diay sa federation....?

At least kuno nagpakatutoo lang daw siya....

Pagminyo na, tiguwang kana!

NAKAHUNAHUNA ko og sulat niini sa dihang nabasa nako sa blog ni Batang Buotan ang mahitungod sa pag-awhag sa iyang mga amigo nga paminyoon na kini. Nagtuo ko nga ako ra ang daw sa nabungol na sa maong awhag. Maayo gani tong iyaha nga ingon lang siya nga "Kanus-a ka ba magminyo?" Ang ako kay aduna may pakapin "Pagminyo na, tiguwang kana!" usahay dungagan pa gyud "Na mabiyaan ka gyud sa tren," "Dili gyud ka kakita sa imong liwat."

Bation ba nako nga gisunhan naman tingali sila sa akong dagway nga usa ko ka ulitawo. Mao nga mitan-aw ko sa samin dili pa baya pud ko tingulang nga ingnon ko nila nga paminyoon na. Usahay gamiton na lang nako ang tubag sa uban nga "May man og lumba nang kaminyoon."

Apan ang maong tubag daw nagbilin baya pod og gamay nga kusi sa akong kasingkasing nga makaingon ko sa akong kaugalingon nga basin tinuod ang ilang giingon.

Sa makadaghan na nako kini nga madungog gikan sa mga hamtong nga ang kaminyoon dili sama sa kan-on nga imong gihungit ug sa dihang nainitan ka mahimo nimo kini nga iluwa. Sa pagktinuod ang kaminyuon giplano kana tungod kay kaugmaon ang nakataya niini. Adunay daghan nga batan-on pa nga nagminyo apan nagkaletse-letse ang pamuyo. Hinuon dili tanan apan kadaghanan. Kana ang hinungdan sa dili maayo nga pagkaplano sa pamilya.

Kon magminyo man ako dili tungod kay nabungol nako sa daghan na nga awhag sa akong mga higala ug mga kaila. Apan magminyo ako tungod kay gusto nako--tungod kay nahigugma ko sa babaye nga takos sa akong pagmahal nga mahimong akong asawa hangtud sa kahangturan.

Ang dinalidali nga pagminyo man ugod sama ba sa usa ka pagpanglaba nga gidali-dali nga wala maayong pagkakuso nga miresulta nga makita lang gihapon ang buling. Apan ko maayo nga pagkakuso ug pagkalatag ang resulta klaro ang kaputi ug ang kahinlo.

Daghan usab ang mga rason ngano nga ang uban wala magdali-dali ngadto sa kaminyuon dili kay nahadlok sa responsabilidad apan tingali aduna pay misyon nga gituman. Sama kanako dili mahimong magminyo ko nga dili nako maplastar ang akong mga igsuon nga nagsalig kanako. Tungod lagi kay sayo kami nga gibiyaan sa among mga ginikanan sa dihang giganoy sila sa kamatayon.

Isip kinamagulangan nga anak sa siyam ka managsuon ania kanako ang bug-at nga responsiblidad. Hinungdan nga palabihon ko una sila nga makabaton og maayong ugma kay sa akong kalipay.

Isakripisyo ko ang akong kaugalingon nga kalipay tungod nila. Lisod nga magmugna ko og pamilya apan nagbilin ako og mga nagun-ob nga kaugmaon nga gisangon kanako sa mipanaw na nga mga ginikanan.

Samtang ang tinuod nga gugma usab makapaabot kana kanako. "True love waits".