Dolphy, patay na

HIKABSAN sa iyang kinabuhi si Dolphy.

Dili ang komedyanteng si Dophy kon dili ang dolphin nga na rescue sa pipila ka mga mananagat sa Sibuco, Kolambogan, Lanao del Norte ug sa mga lumlihihok sa dxDD-AM ug Operation Tabang.

Ang Dolphin gidakop sa mga mananagat human nga ilang namatikdan nga aduna kini samad. Ang usa sa mga mananagat nga nakadakop nagngalan og Dolphy hinungdan nga gisunod na lang usab ang iyang ngalan nga gibunyag ngadto sa Dolphin.

Gani giasoy sa mananagat nga nakadakop nga mihilak pa ang maong dolphin.( Dili tungod kay gibunyagan og Dolphy tingali tungod kay nadakpan kini.)

Human nga makataho ngadto sa usa ka sakop sa militar ang mga nananagat dali dayon nga nakigdugtong sa dxDD-AM si Corporal Allan Pescones , 1st Civil Miltary Operations Unit, Philippine Army hinungdan nga gihikay dayon ang usa ka rescue operation ilabina nga adunay samad ang dolphin.


Pinaagi ni Fernando Dumanjug, station manager sa dxDD-AM ug sa mga kauban nakigdugtong usab dayon kini sa buhatan ni Misamis Occidental Governor Loreto Leo Ocampos aron sa pagluwas sa maong dolphin.

Gumikan niadto gipadala usab sa gobernador si Manoling Yap ang operations manager sa Misamis Occidental Aqua Marine Park (MOAP) aron sabutan ang pagluwas sa dolphin.

Gihatod sa grupo nila ni Pescones ang dolphin pinaagi sa pumpboat gikan sa Kolambogan padulang sa Cotta Beach sa Ozamiz diin gitagbo kini sa mga lumilihok sa dxDD-AM ug ni Yap.

Human niadto dali kini nga gidala sa MOAP ilabina nga adunay daghang binuhing dolphin usab sa maong dapit.

Gisaysay ni Yap nga adunay ganti nga madawat ang nakadakop sa dolphin kon kini mabuhi sulod sa usa ka semana nga pag-obserba.

Dali dayon nga gidapatan og tambal ang dolphin.

Labihan ang kalipay nila tungod kay lahi sa ubang dolphin nga madala sa MOAP dali kini nga misagol ug mikuyog sa panon sa pagpanglangoy.

Gumikan kay mikuyog man sa paghatod ang mananagat nga si Dolphy nahukman nga Dolphy na lang usab ang ingalan sa maong Dolphin ilbina nga ilang namatikdan nga laki usab kini.

Nagtuo usab ang lumilihok sa MOAP nga makalahutay gyud si Dolphy apan pagdangat sa tulo ka adlaw nakabsan kini sa kinabuhi gumikan usab sa laing samad niini sa iyang tiyan.
“Gidapatan baya gyud sa atong doctor og tambal apan wala naman gyud kini matabang,” saysay ni Yap.

Nagtuo ang mga nakadakop niini nga kon ang dolphin aduna kini kapikas nga si Zsazsa siguradong naguol gayud kini kon masayod nga patay na si Dolphy.