Gugma na ba kini?

Unsa bay anaa sa imong mga gakos,
Nga dili ko man kini mahimong kalimtan?
Daw mas tamis pa sa putyokang dugos,
Unsa bay bertud niini nga sa hunahuna anaa ka man?

Unsa bay gahom niianang imong pahiyom,
Nga sa katulogon giganoy mo ako?
Sa akong pagmata wala na ako mahinumdom,
Nganong ania na ako sa usa ka paraiso?

Unsa ba kanang gipasimhot mo kanakong ammonia,
Nga kanunay akong mangandoy sa imong katahom?
Daw puya akong nalingaw sa imong mga hagwa,
Unsa bay gihimo mo kanako?

Unsa ba nga ilimnon ang gipainom mo kanako,
Nga dagway mo lamang ang nakita sa akong kahubog?
Sa matagtungang gabii nga ako nagabakho,
Nganong ngabil mo kanako makapaskog?

Nagpabilin ka nga usa ka misteryo kanako,
Nagpaabot ako sa tubag, Kinsa ka ba?
Wala ako makasabot sa imong kihat-tando,
Kinsa kaba? Ikaw ba ang giingon nila nga gugma?