Katapulan, kagutom ug ang pato

MOTAN-AW kita sa atong palibot karon daghan sa atong mga igsoon ang gigutom. Daghan ang gitawag nga grassroots of the community. Ang kapobrehon man gud sagad atong ibasol dayon ngadto sa mga namunuan kay lagi gikorakot ang kuwarta alang sa ilang mga personal nga interes.

Daghan nga atong makita nga mokalit lang og panguhit kanato sa daplin sa dalan, sa simbahan ug bisan asa kay mangayo o magkilimos. Kon tan-awon nato kini nga punto mora og mabasol nato ang gobiyerno apan kon atong tugkaron pag-ayo ang mabasol nato niini mao ang katapulan sa usa ka tawo.

Duna bitaw giingon kaniadto ni John F. Kennedy nga dili nato paabuton unsa ang mahimo sa gobiyerno alang kanato kon dili unsay atong mahimo alang sa gobiyerno. Ipasabot nga dili nato nga kanunay nga iyangongo sa gobiyerno ang atong mga gikinahanglan. Mao nga daghan ang gigutom tungod sa katapulan sa tawo. Alang sa mga tapulan mosulay kita og paniid sa hulmigas nga bisan wala silay kapatas o mga amo apan naningkamot sila alang sa pagpangita ug pagkaon sa ting-init aron duna silay makaon panahon sa ting-ulan. Sama unta usab niana ang buhaton sa mga tapulan dili kay magsige lamang og katulog.

Tuod basin mangutana kamo ngano man nga dunay pato nga nabutang sa ulohan niining akong obra karon. Kini man gud maykalambigitan sa giingon sa uban nga iampo na lang nato sa Ginuo ang tanan aron kita tabangan. Dili sad kana mahimo kay sumala pa lihok tawo kay tabangan ko ikaw.

Ay balik ta sa pato. Si Juan lagi kay hilabihan katapulan uban sa iyang dose ka tapulan sad nga mga anak gadagko lang ang lawas wala nay makaon. Mao nga ang gihimo ni Juan iyang gitawag ang iyang mga anak nga mag-ampo na lamang sila sa Ginuo aron tabangan sila.

"Mga anak maggunitay kita sa atong mga kamot ug mangayo kita og pagkaon sa Ginuo," awhag ni Juan sa iyang mga anak.

Mao kadto nga miampo dayon si Juan uban ang iyang mga anak nga nagpiyong dungan sa pagsinggit ngadto sa Ginuo. "Ginuo! gutom na kaayo mi tagai mi og pagkaon!"

Sa dihang nakadungog ang Ginuo iyang gisugo ang usa sa iyang mga anghel kadtong pinakalabong gyud og pako aron dali nga makaabot sa nahimutangan ni Juan.

"Anghel adtua si Juan nga gigutom na kaayo ingna nga gisugo teka," sugo sa Ginuo.

Wala maglangan ang anghel miadto siya sa nahimutangan ni Juan. Iyang naabtan si Juan uban sa dose ka mga anak niini nga nagpiyong nga nagpunay gihapon og panawag og panabang sa Ginuo mao nga iyang gikuhit ang ilong ni Juan.

"Juan gisugo ko sa Ginuo."

Dali nga gibuka ni Juan ang iyang mata ug nakurat sa iyang nakita ang anghel sa iyang atubangan.

"Mga anak bukha ang inyong mga mata, tabangi ko ninyo diay dako kaayong pato pagkaon nani ato ning tabangan og himolbol," singgit ni Juan dayon layog sa anghel.

Gumikan sa kagutom man gud pato na ang panglantaw ni Juan sa anghel.

Kamo na lay tapos unsay nahitabo sa anghel ha.