ILIGAN City - Talandugon ang kahimtang sa usa ka komentarista sa radyo human gipusil sa wala mailang lalaki kagahapon sa buntag duol sa usa ka tunghaan ning siyudad.
Ang biktima mao si Jose "Joe" Pantoja, hingkod ang panuigon ug blocktime commentator sa dxLS "Love Radio" FM.
Ang inisyal nga imbestigasiyon sa kapolisan nagbutyag nga nahitabo ang pagpamusil nga alas 7:10 sa buntag.
Sa wala pa ang pagpamusil gikan naghatod sa iyang anak sa tunghaan ang biktima sakay sa iyang motorsiklo. Sa pagbalik ni Pantoja nihunong kini sa usa ka copying center duol sa Mindanao State University-Iligan Institute of Technology (MSU-IIT) sa Tibanga highway aron magpakopya og mga dokumento.
Usa ka armadong lalaki nga naka-bonnet ang niduol sa biktima og nipusil kaniya makatulo ka higayon gamit ang kalibre .45.
Samad sa tuong kilid ug sa tiyan nga bahin ang naangkon sa biktima.
Dali nga nisibat ang suspetsado ug nisakay sa naghulat nga motorsiklo nga gimaneho sa laing naka-bonnet nga lalaki.
Samtang dali usab nga gidala sa Mindanao Sanitarium and Hospital mga 200 metros lang gikan sa nahitaboan ug anaa kini sa kritikal nga kahimtang sulod sa intensive care unit.
Dili pa matino ang motibo sa maong pagpamusil apan dako ang posiblidad nga may kalambigitan kini sa iyang trabaho human kini nakadawat og ubay-ubay na ka mga hulga pinaagi sa text messages.
Gilauman ni Mayor Lawrence Cruz ug sa mga kadagkuan ning dakbayan nga mahatagan og daling kasulbaran ang maong hitabo tungod kay adunay naka-instalar nga surviellance camera didto sa nasangpit nga lugar nga posibling maoy makahatag og giya kung kinsa ang responsabli sa maong hitabo.
Samtang gimando sa hepe sa Police Regional Office (PRO) 10 nga hatagan og igong seguridad ang sakop sa prensa nga giluthang sa dakbayan sa Iligan samtang nagpabilin kini sa tambalanan.
Lakip sa gimando ni Chief Supt. Teodorico Capuyan, Police Regional Director sa PRO-10 ang hugot nga imbestigasyon sa maong hitabo.
Subay niini gipaguwardiyahan na sa mga polis ang tambalanan diin gidala si Pantoja aron maseguro nga dili kini tiwasan sa mga suspetsado.
Dili pa lang dugay gibutyag ni Capuyan nga usa sa gihingusgan sa bag-ong PNP Director mao ang dali nga pagsulbad sa extra judicial killings nga nahitabo partikular na sa mga sakop sa prensa nga nangabiktima.
Nagkauban pa gyud mi ani niya sa usa ka seminar adtong Sabado sa Iligan. Pastilan lagi ning kinabuhi aning naka-media oi.
Subscribe to:
Post Comments (Atom)
5 comments:
Gikundenar nako ang brutal gyod nga pagpatay kang Jose Pantoja. Nadungagan na sab ang mitaas na nga listahan sa mga sakop sa media nga gipangpatay. Mura'g sayon ra kaayo nila ang pagpatay no?
Hinaut unta nga masulbad dayon kini nga kaso ug motumaw ug masilutan ang sad-an.
sa nasud diin lagsik ang demokrasya, daghan usab sa mga taga-press ang gipangpatay. apan bisan pa niini, nagtoo ko nga padayon nga makigbisog alang sa kamatuoran ang mga taga-media.
Una sa tanan akong pahasubo sa pamilyang Pantoja. Ikaduha akong pagyukbo sa mga sakop sa medya nga bisan daghan na sa ilang mga kauban ang gipamatay sa gihapon wala mahadlok sa pagwiwi ug pagbutyag sa mga kahiwian nga nagakahitabo sa katilingban.
Sa atong kultura man gud usa ka panamastamas kon pakaulawan ang tawo sa publiko. Mawad-an siyag nawong nga ikaatubang sa uban. Bisan pa og tinuod nga gibuhat niya ang usa ka salawayong butang bation gihapon niya ang kaulaw.
Ang tukma ug sibilisado unta niyang buhaton human siya naulawan mao ang pag-undang sa pagbuhat sa daotan. Apan dili ni mao. Hinuon,masuko ug manimalos siya nga moabot sa punto sa paghunos sa kinabuhi.
Sama sa mga tawo nga nalambgit sa mga ilegal nga binuhatan sulod ug gawas sa gobyerno dili nila buot nga magbag-o hinunoa mangitag paagi nga mahilom ang tingog nga nagsinggit sa ilang mga kahiwian sa publiko. Kon dili madala sa kuwarta, gamiton ang hulga ug bala.
Tinuod ania na kita sa kawhaan ug usa nga siglo apan duna pay kinaiyang ihalas sa kasingkasing sa tawo. Sa kanhiay, bato ug punyal, sa karon , pusil ang iyang hinagiban sa pagpatay sa iyang igsoon.
Ang dakong pangutana: unsaon kaha pagsangyaw sa gugma ug kalinaw niining mga tawhana? Pamalandongan nato kini.
taym pa, mura'g nasayop ko da. akong basa patay pero mao man diay ni ang summary lead, Talandugon ang kahimtang sa usa ka komentarista sa radyo human gipusil sa wala mailang lalaki kagahapon sa buntag duol sa usa ka tunghaan ning siyudad.
pasayloa ko sa akong dakong sayop!
sori sab. nasayop sab ko sa unang parapo nga akong gisulat.
i visited joe last thursday sa Mindanao Sanitarium, just in time for his release from the said hospital. storya mi ginagmay. Nianang sabado man gud sa wala pa siya pusila nagkatagbo pa mi sa among seminar sa iligan. ingon si joe wala siyay laing gidudahan pero dili siya mongalan si kinsa ang nagplano mopatay niya. ang media ra ba adunay kalibog sad kay sa pamahayag gikan sa kapolisan nga nagimbestigar, adunay ngalan nga naapil nga kadudahan. ambot, i sense there is something done here that will surely muddle the case against the alleged suspects of joe's slay attempt. buhi akong amigo apan patay na hapit ang kagawasan sa pagsulti kung dili mahatag sa gobyerno ang iyang gisaad.
Post a Comment