Kon Akoy Kapitan

(Note: Kini nga obra iya kini sa usa ka Serg Santafe nga nagpangidaron na og duolan sa 80 anyos kanhi usa ka magsusulat sa Bisaya Magazine nga taga-Ozamiz, mao kini ang iyang pangandoy sa kinabuhi aron daw makatabang sa katawhan.)

KARON kay nagsingabot na ang eleksiyon sa barangay, kini ang atong tema karon. Kon ako pay kapitan, ang barangay mouswag ingon man ang katawhan. Mao kana ang tinuod bisan pa og pustaan. Pangandak no?

Apan yuna pa. Ikaw higalang magbabasa moingon ka tingali nga ako wala gani makapauswag sa akong kaugalingon ang pagpauswag na ba sa barangay ug katawahan?

Oo, akseptahon ko kana nga opinion. Apan hibaloi nga ang gihatag sa Dios nga talento sa magsusulat mao lamang ang ‘power of thinking, dili man power of doing.’ Unsa man kahimoan sa thinking kon walay doing?

Duna usay giingon nga, “Plan what you do and do what you plan.” Nga kini kon dili mag-uban walay kahimoan. Ug ako niay daghang plan apan wala may do, unsa may mahimo?

Ako lagi unta dugay ra nga naghunahuna nga mokandidato og kapitan kay akong ipabuhat sa mga tawo ang akong mga plano. Ako man nga gihunahuna nga walay makuha nga isda kon walay paon ang taga. Unsaon man nako pagdaog nga ako wala may ikapamalit og boto? Kataw-an lang ako sa guwatsinanggo nga pugapo?

Mao kini ang akong plano kon akoy kapitan. Ang mga tawo akong patamnon og saging, kamote, talong, pinya ug kamoteng kahoy. Ang gamay nga luna, 20 ka punoan nga saging, usa ka libo nga talong, usa ka libo nga kamote ug 200 nga pinya. Ang dakog luna, 50 ngadto sa 100 ka saging, 2000 ka libo nga talong, 2000 nga kamote ug 500 ka pinya. Kini dako nang tabang pagpauswag sa panginabuhi.

Kada pasko ripahon ang tanang mag-uuma. Dako nga primyo. Ang among suweldo kuhaan og ipremyo pun-an sa akong pangayoon sa mga opisyal sa dakbayan. Niini ang katawhan magkugi gayod. Kay doble man ang ilang paabuton. Ang produkto sa ilang tanom u gang dakong premyo.

Lain pa sa mangga bisan tag napulo lang ka punoan. Kini ang akong ihatag nga insentibo sa katawhan. Kay ang mangga kon dagko na sa lubi ang punoan, bisan unsa pay kuhaon nga kurso sa mga anak makagasto na.

Kini unta ang akong plataporma. Apan lagi ang botante adto man tan-aw sa numero sa kuwarta, dili man sa plataporma. Labot pa ang tawo adto man mutuo sa ila nang nakita, dili man sa wala pa makita. Tinuod man ang giingon ni Longfellow: “We judge ourselves by what we feel capable of doing, while others judge us what we have already done.”