Asawa labaw pa sa bana

GIYAWYAWAN sa Misis ni AFP chief of staff General Hermogenes Esperon ang mga pari sa Saint Ignatius Cathedral sa Camp Aguinaldo niadtong Dominggo, human wala mahisguti ang mga ngalan sa mga namatay nga mga sundalo sa Sulu.

Misulong si Lorna Esperon sa opisina ni Monsinyor Albero Sungco ug nangayo og pagpasabot kon nganong wala hinganli sa panahon sa misa ang mga ngalan sa napatay nga mga sundalo.

Wala mapugngi sa iyang mga amiga si Ginang Esperon sa dihang nagsugod kini sa pagpangasaba sa buhatan sa monsinyor.

Bisan gani sa AFP medical center diin nagsilbing civilian doctor si Ginang Esperon, mipakita usab kini sa iyang dili maayong taras o dautang kinaiya nga labaw pa sa 5 star general kon mao nay manugo.

Buot ni Ginang Esperon nga tawgon siya sa sulod sa maong tambalanan nga Doctor Madam Esperon isip daw respito sa iyang bana nga overall commander sa tanan nga mga military units.

Kini nga matang sa pamatasan ni Ginang Esperon sama kini sa usa ka langaw nga sa dihang nakatungtung sa buko-buko sa usa ka Kabaw nagtuo sad siya nga Kabaw siya.

Hinuon kini nga taras, wala mag-inusara si Ginang Esperon dunay daghan sab niini. Sama pananglitan sa usa ka asawa sa barangay Kapitan nga mao na hinuon ang magbuot sa usa ka barangay. Wala nila hunahunaa asa kutob ang ilang utlanan.

Duna poy uban nga bisan ang bana ra ang mayor ang asawa kon molihok labaw pa gani sa mayor.

Kining mga tawhana sama sa adunay sakit nga piniling pagkalimot kon sa Ingles pa ‘selective amnesia’. Nakalimot sila kon si kinsa sila. Sama gud sa akong giingon sa unahan nga sama sa langaw nga nakatungtong sa likod sa Kabaw.

Ingon ninana gyud tingali kanang mga tawo nga sa sobrang tagay sa gahom ug salapi…gibati na sila sa ilang kahubog! Tsk!Tsk!Tsk!